البستلة

البستلة

أخوي الصغير جاء ناداني من الشارع قال لي :- أمي قالت لك تعال الواطة مغربت كفاك لعب تعال أشرب شاي المغرب ... صحباني البيلعبوا معاي قالوا لي نحنا راجنك فشان نلعب حرّينا ( شدّت ) اشرب شايك قوام لا تتأخر... مشيت كبوا لي الشاي إنجغمتو فسراع فسراع عشان أزوغ أمرق الحق البطان .. أمي كانت تقول لنا اللعب ساعة المغارب ماهو زين .. فشان الشواطين قاع يحومن بالليل ... أها بقيت قاعد راجي أمي تدخل على التكل بى ورا .. وأنا أنسرق براااحه أمرق ... جات قعدت فوق عنقريبا وقالت لي : أمش جيب لي العلبة اللت الكركار الفي السحارة الجوا ديك اللمسح كرعي ديل ... وجيب معاك البستله عشان تمشي تجيب لنا فول من حسب الله نتعشابو ... ده الكنت خايف منو ... والبطان راجني لى اللعب ... والواطا بقت ضلمة ودرب السوق دا درباً موكّر وانا بى فليل قاع أخاف امشي السوق براي ... قت لها نحنا شربنا الشاي أسع مانا دايرين لنا عشا ... قالت لي : إنت إن بقيت ماك داير لك عشا الناس التانين ماهن دار ياكلوا شي ..؟ الشاي دار يبقى لك عشي ..؟ قوم لا فوق قبال الواطة تضلم زيادي ... شلت البستله وانا مصرصر وشي متل الدار يسوقوهو على الضبح ... لبست نعليني ومرقت .. نسيت أشيل البطارية معاي ... ماشي وإتلفت .. وبى سري ( أبسمل ) – أقول ( بسم الله الرحمن الرحيم ) وقلبي يدق ... بس نقاره عديييل ... عامني لساني طويل طول وفصيح فصاحةً , موقف البطان المعاي في الحلة على فد رجل ... جيت في حتة كدي ملانه تمر طواااال وشدر الليل منقة ...والناس قاع يقولوا بسم الله علينا  ( عز نحل ) ساكني بى هني في الدشش ديل ... ومن شدة الواطا ماها ضلمة كان مديت إيدك ماب تشوفا ... كان كشكش شي تحت تمرة سااااكت قلبي دا يقول وح .........بس يتخيل لي في شيتاً دار يجي ناط فوقي ... أشيل كراعي وأختها براحه عشان ما إنترتع لي فوق جدول ولا دقشة اللت تمر ... وانا ماشي على السوق ... بقت لي المسافة بعيدي خلالالالاس ... ضو الرتاين في الدكاكين ظهر لي من بعيد و إنطامنت شوية ... وصلت ... إشتريت الفول آزول .. وشلت هم الرجعه ... كان رجعت بى الدرب الجيت بو أسع دا روحي بتنسلا عدييل , أصل أهلي جنازي بس يبردوني ويدفنوني ... جيت وقفت لي جنب شدرة كدي قلت يبقى القى لي زول مندلي على جيهتنا أقوم أباريهو يتقلني شوية لامن أصل أهلنا ...ما لقيت لي زول .... والوسيعي دي ضاقت بي ... وإن بقيت إتأخرت كمان ناس البيت يقولوا لي مشيت تلعب وخليت المرسال يمسكوني يدقوني ... وكرت لي وكرةً كعبي بالحيل ... بديت اقول بسم الله من محلي الواقف فيهو داك وأمشي خطوة خطوة وأرجف متل الزول الماسكاهو الملاريا أم برد ... ساعة وصلت جنب محل التمر الطوال داك ..هبت هبيبي كدي وروسين التمر ديل بقن يرقصن .. في الضلمة ديك بس يبقن لي دار يجن واقعات فوقي ... جيت تحت شدرة منقة غزيري كدي والهبوب تلفح فيها جاي وجاي , إتكسر منها فرع وقال لك رت وقع قدامي ... أنا غايتو لقيت نفسي عند أهلي جوا .. حفيان .. والبستلة اللت الفول ماها في إيدي  ..

عبدالعظيم الطاهر عثمان

فار من الخرطوم وفارين من البلد

                          فار من الخرطوم وفارين من البلد

فار .... كان عايش في الخرتوم ... مرق الدغيش بدري يندردق ويلعب مع رفاقتو فوق شوالات اللات سكّر .. إتحشر لو في شوال غلبو يمرق تاني .. ساقتو المقادير بى شوالو ده فوق لوري .. مرقها في كريمي ... ومن كريمي بالبنطون على نوري ... وفي نوري في دكان في سوق الجبل ... تلاتة أيام  أكلو وشرابو ياهو السكّر .. قرض الشوال بى ركين ومرق في الدكان يشمشم .. قال يبقى القى لي رغيفايِّي ولا شي تاني بلا السكِّر ... مشى لو على شوال كدي لقاهو الليل تمر ..وواقفات جنبو فارين ...شبَّن على كرعيهن وبقن يعاينن لو ... عرفنو غريب .. مدردم وغليد وشنبو طويل ما لاهن ...سلّم عليهن ... قال لهن تاكلن في شنو ..؟ قالن لو تمر ... قال لهن :- وده بجيبو من وين ...؟ ما فهمنو ... مرقن لو فقشي أدنَّها ليهو ضاقها .. لوى خشيمو وقال لهن : قدر شوكولاتتكن ... سألنو إنت جيت من وين ؟؟؟ ... قال لهن أنا جايِّي من الخرتوم ... آ زول إنصاحبو وحكى لن قصتو ... حام معاهن الدكان محل محل .. ما لقى غير التمر والفول المصري ولوبي عفن وقرمسِّي وياهو السكر وحب الشاي بس ..قال لهن : الدكان ده مافيهو جبنة ولا زيتون ..؟ عاينن لى بعضن وسكتن .. بقى يسوي لن والله انا في الخرتوم كنت أفطر مرة بالجبنة ومرة بالزيتون وكل يوم أنوِّع بى شكل .. نط واحد منهن قال لو : والله الزيتون ده انا سامع بو .. سيد الدكان ده مرات المغيرب كدي يستحمى ويقيف في البرش بره ويسوي التين والزيتون لكين آ بعرفن شنو ..؟ علا الجبنة ضقتها قبَّال دا وما عجبتني .. إنشعبطت لي فوق سرج الليل حمارة سيدها كان ماشي على سوق الباجور في نوري ... دخلت لي في دكان هناك إتلمضت  زييين ما خليت لي شي ... بس في الرجعة علا جيت مباري الجدول وأرجف نامن وصل هني .. الواطا كانت ضلمّة ... خفت تلاقيني كديسي من كدايس الجناين ديل ... قال لهن :- طيب ما نمشي سوا ياخي ... قال لو أوعك .. إن مرقت من كدايس الجناين ما بتمرق من الحمير مطلقات هناك في السوق بتل العنَّابة الحاتِّي ... يعفصنك يقطعن لك ضنيبك .. انا الحمارة الإنشعبطت فوقها دي وكت نزلت منها عفصتني بى ضلفها فوق ضنبي كانت جاي تخليني عبرة وسط الفيران ... حرّمت المشي للسوق من اليوم داك ..قبلنا هني كفانا ... مرة مرة يجي واحد شايل لو كريتينة منقة نلقالنا فيها عضّة ... ولا شوال بصل ناخد لنا منو قريمات ... فار الخرتوم قال لهن :- والله مرة دخلت لي في ( ديب فريزر) بى تحت في ( سوبر ماركت كدي)  ... أماني ما عيدت عيد اليوم داك .. سويت البدع ... الجحر الدخلت بو غلبني أمرق بو تاني ... علا بقيت  أقرمط وأقرمط نامن سنيناتي كانن جاي يوقعن ضمّة  خرمتو زيادي .. حتن قدرت مرقت لا برا ... بس ربك ستر ما زرُّوني جوَّا ... وديلك مقهات يسمعن في حديثو ... أها لقيت أشنو ..؟ لقيت لي سمك فيليه ...وبوفتيك .. ومورتاديلا ...وكفتة ... وسجق ... ما فهمن شئ ...!!!؟  قالن لو الاسامي دي نحنا مانا فارزنها شي ...؟ قال لهن يا أخواننا انتوا قايليني قاعد أرطن ..؟ قالوا لو ياخي نحنا هني أكلنا ياهو الشفتو في الدكان ده  , وإن بقينا محظوظين يكون في عرس ولا سماية ولا طهورة .. اليوم داك نتعازم كلللنا الحاضر يكلم الغايب ... والقريب يكلم البعيد ... دحين إنت إن بقيت أكلكن هناك يا هو كدي , كريشتك الجيت بها دي ياها المميوصة هني ... يا كمان الدرب الجابك يصددك على بلدك ... أخد لو صنّة كدي وقال لهن : طيب سيد الدكان ما عندو بضاعة قاع يرسلها للخرتوم ...؟ قالن لو : غايتو علا ترجى موسم المنقة يا موسم التمر اللواري بيجن يقيفن هني قبل الدكان ده تنشعبط معاهن ..قال لهن طيب يلاكن معاي ... قالن لو : نحن الحمير عرفنا فيهن شنو نامن كمان نمشي لعربات الخرتوم ... ود أخوياً لينا مرقها في مروي القريبي دي فجختو عربيِّي رقدتو بتل البنضورة , وراح في حق الله ... نحنا هني نحمد الله لا عربية تفجخك ولا نعال تعفصك .. جدودنا عاشوا نامن شافو جنى جناهن يحمدو الله ... واحدين فيهن نامن سنونن وقعن نلوك لهن الكسرايِّي ونلقمها ياهن ... والناس هني طيبين لا شرك يقبضك لا بصلاية مسممة ..إن عطشنا من كوز الطير نشرب قدام عيونن , لا يقولوا لنا كر لا يقولوا لنا فر ... والكدايس نشوفن فنِّي في الدهر من بعيد لا بعيد ... إنتوا في الخرتوم قالوا ساكنات معاكن في البيوت يا كافي البَلِي ... غايتو إن بقيت قعد معانا بنتعلم منك حاجات ... باقي فيران الخرتوم نجاااااط بالحيل وعاقات  ... وإن بقيت مصر على المشي كمان الله يعدل عليك 0 أقنعنو قعد معاهن آ زول وعرسوا لو منهن ... علا جاب لو وليدات نسعل الله السلامي .. يسرقوا الكحلة من العين.

عبدالعظيم الطاهر عثمان

مرة في البلد

مرة في البلد

مرة في البلد حمد ود علي ود حسين … نجح للجامعة كان ممتحن من مدرسة مروي الثانوية .. اهلو سوولو كرامة اللت نجاح في الخلوة اللتنا … رشوا البكان وفرشوا البروش .. وجابولهم زير حفروا في الواطة وغزوهو… وملوهو موية للغسيل و الموية اللت الشراب جابوها في الجرادل اللات الطلس الكبار وغتوها بى شاش ابيض من الضبان… أها ناس قعدوا جوه في الخلوة وناس قعدوا في التقينت الليل الجديول البرة الجاي من الحفير الكبير … بعد ما اكلوا وقاعدين متفرجخين يشكنوا في سنونهم .. راجين الشاي .. جاء علي ود اب ضراع يقدل من بعيد لابس لو جلابية بيضاء تراري مع شمس العصير ديك وشايلو سبحة في إيدو…. قاموا الناس القاعدين برا وقفوا على حيلهم دار يسالموهو .. كان لا فوق طوَّل مسافر .. ولادوا رسلولو في الخرتوم فشان يفحصولو الدم .. الملاريا كانت مجنناهو جن .. يطعن في الحقن وينقرشو لو في القريفتن .. ويبلع في الحبوب ويسقوا فيهو في القرض والعرديب نامن حلقو إندبغ .. وما خلتو شئ … وقفوا قالدوهو وقالولو ويييين آزول الحكايي شني ..؟ مالك طول كدي ..؟؟ نحنا قلنا يبقى الزول ده ولادوا مسكوهو عرسولو وحيدتن من لا فوق .. من المملسات ديلك وسكت قعد قبلو تاني ماهو جايي صاد ..؟ قال لهن لا والله الشئ انا كنت في الحجاز… ولدي الفي السعوديي رسل بى هناك قال لي ما دام وصل لا الخرتوم هني تعال الحج مرة واحدة … واتسهلت لي وسافر من هناك .. وعاد الحج جنس خلق و دفسيبةً .. ناس سوق تنقاسي ان طبقوهن ميَّة مرة ما يجوا قدر الناس الفي الحج .. العميان شايل المكسر وتحلف وتقسم تقول ما فضل زول عند أهلو .. والنّاس الحمُر ديل أماني ماهن كتار هناك وعاد جنس شيتاً في البلد ديك ..هو شنو الماهو في ..؟ الكهارب ديل ما يدنك الدرب والاكولات ديل ما تعرف تاكل شنو وتخلي شنو ..كبابي الشاي اللاَّتن ماهن بتل اللاَّتنا .. دخل ايدو في جيبو ومرق لو سبح وبقى يقسم فيهن .. أدَّا ود عثمان واحدي قالو هاك الهديي اللت الحج دي … ود عثمان بقى يقلب فيها في ايدو ويعاين لها ..قام قالو مالك ما جب لي جلابية بتل اللتك دي امشي بها للجمعة .. جايب لي سبحي قايلني أصابعي مقلمات ..؟ أسع دي هديتك لَيّ ..؟ في نضمهم ده المغرب دخل قامو يصلو .. كمَّلُوا صلاتن والامام سلم … ود حسن ابى يسلم اخد لو مسافة حتن سلم والناس يعاينولو.. بس قبل على الامام بعد ما سلّم وبقى يكورك .. انت آشيخنا علي اليمين صلاتكم دي ما تمت ….الامام قالو ما تمت كيفن ..؟ قام ود حسن قالو انا ما كملت التشهد الليلي انتو تسلمو كيفن .. الامام قالو نان انت تسوي في التحـ … التحـ…. نحنا نقعد نرجاك لا بتين ..؟ التحيات يا الله تكملها في ساعة … ود حسن كان تمتام..‍‍

عبدالعظيم الطاهر

( السنجك )

( السنجك )

            الفي شنو آ السنجك ...؟ تعال تعال أقعد بى هني جنبي في العنيقريب ده بس أوع الشنّاط المهرود ده يهبر بك ... ياخي والله ناس عجيبي خلاس ... لقى الجماعة قاعدين جنب الجدول تحت رويكيبة كدي والدنيا فسخيبة الشدر مرسوم رسم ... خرت عرقو بى كم العراقي الليلو وقعد في العنيقريب ... ياخي والله الزمن ده الناس بقوا آ بعرفن كيفنهن ... صالح عقب لو السؤال : مالك آ زول الفي شنو ... الليلي مالك معكرن كدي ...؟ كُت قاعد جنب الناس ديلك تحت المنقاي ديك ... أشر لهن بى إيدو ... ماكن سامعين حسّهن ..؟؟؟ لالا ماب يصلنا هني ... مالن .؟؟ آ زول قميرتنا قايمي من قبيل قربت تجيب لها فدغيبة ... صالح : شيتاً لا كدي ..؟؟ أي والله ... عليك أمان الله نتونس في ونستنا , عبدالصمد قال البارح شايف لو منام , قلنالو إن شاء الله خير, قال شايف لي رؤية ماني لاقي تفسيرها ...قاااااال كارداتنو كدسة زرق وكبااااار قبل السبيقة اللت ناس العوض الفوق البحر ديك ... وهو يجري حد ما فوقو من حيل ويلقى نفسو واقف قبلو في محلو ... ويتلفت يعاين لهن يلقاهن كل مالن مقربات منو وكت ما لقالو طريقة قبل عليهن بى وشيهو واحدي فيهن غليدي جاي تنط فوقو قال رفعت كراعي وحد ما فوقي من مروة أديتا شلوت قال صحيت نصايص الليل أزغرت بى طول حِسّي ... وكراعي اليمين دي ماني حاس بها والفانوس الكبير الليلنا مدردق في الواطا هو في بلد والطريبيزة في بلد ... ناس البيت من جم لقيتن واقفين قبل رأسي ومغزغزين كيعانن في نصهن يفتحوا عين ويغمدوا عين ...يتلولحوا قبلي ومتبكمين ,قت لهن أمشوا أرقدوا ... زولاً فيهن قال لي عينك في رأسك ماهو في ... علاّ أمي يا حليلها بى ليلا داك دقت لها قرض بى ملح لبختو لي فوق كراعي حتن رقدت نمت ... أها أنا قت لو الشي دا ماهو رؤية ... ده حلم ...كان تقبّل على إيدك الجنفا دي وتتف تلاتي مرات وتتقلب على الجيهي البى غادي ... وكان قبيل قبّال تنوم تتحصّن حتَّن ترقد ... ولاد حمد زين التلاتي بى سلامتن كانوا قاعدين معانا ... الحديس جرّا الحديس ...بقيت أقول لهن في الرسول قال ... والصحابة كانوا يسووا كدي ويقولوا كدي وحكيت لهن قصة سيدنا علي الكرّار ... وقت لهن الزمن دا الحال بقى مو ياهو من عمايل النّاس ... والتمرض الظهر في الجنوب دا والقيامي القايمي في بلاد برا دي مو من شويّي ... ولاد حمد الزين التلاتي مدنقرين في الواطا ويقنتوا ... قبيل كانوا بادين لهن حديس يسووا في ناس أجرم .. ناس أجرم ...صالح قاطعوا :- ناس أجرم ديل جنسن شنو ..؟؟ آ بعرفن ... الشي ماهن ناس كتار هن ... بنية كدي أظنها لبنانييّ قاع تغني ...( نانسي عجرم) المهم آ زول ...واحد في ولاد حمد زين ديل قنتيهو كتر وكل مالو يرفع وشيهو مصرصر يعاين لي وتاني يدنقر بتل أكنو حديسي دا ماهو عاجبو ... قت لو آ زول حديسي إن بقى ماهو عاجبك قوم روح أهلك , قال لي تقوم إنت أنا  آ بقوم ... إنت جيت لقيتنا قاعدين هني قبّالك , قُت لو يعني عاجبك حديس الغُنِي والنياصة والغناية ديك عرسوها وديك طلقوها ...؟؟؟ أخوانو الإتنين واحداً فيهن هببّوا لي ماهو في ...أعاين لهن دايرن يهارجوا أخوهن وهن متبلمين , وكت ما قالوا شي قلت انا ( الله يكفينا شر البيعة الكاسري ... والولده الخاسري ) بدل ما يهارجوا أخوهن قاموا فوقي انا ... والشيخ ود علوييّ بقى يفزع معاي وينهزل فيهن آ زول بالحجي حسوسنا إنقرشن انا والله قت يبقى إنتوا سامعين حجتنا دي ... علا واقع مني قسم ... إن ما مشيت لأبوهو وقت لو ولدك دا بقى شيعي أبقى ماني أنا.

عبدالعظيم الطاهر عثمان

           

إسماً متل إسمك

إسماً متل إسمك

إسما متل إسمك يااا .... علمك الدغالة .. ويااااا علمك الهبالة ... ويااا جاب لك الهواء متل الليلي ده ... دخلت أهلي العصيييير كدي جايي من الشغل .. أخدت لي دش وإنجضعت فوق السرير , ماسك الريموت وأقلب في القنوات .. قبل المغيرب بى شويي كدي الموبايل ضرب ...صاحبي علي .. كيف الحال حق الله بقَّ الله .. قال لي ياخي انا من البارح دار أضرب لك ... لكين مع المشغوليِّي والجري نسيتك , أنا مسوي لي كرامة لى ولدي الليلي بعد صلاة العشاء .. دحين تجيب وليداتك وتجي تشرفنا أوعك تعتذر لي ولا تقول لي كدي ولا كدي ... قُت لو سمح .. عديلة آ زول جايينك تب ... ناديت أم الولاد قت لها جهزوا حالكن ... قالت لي أنا حالتي الليلي كت ناوي أسوي لك مديدة الحلبي القاع تريدا .. بالدُخُن ... قت لها خليها لا باكر إن بقى عندنا فيها رزق نتعشى با ...

     وصلنا هناك آ زول جابو الصُفُر ديل فرشوهن ورصرصوا الصحانة ديل شي أصفر , وشي أخضر , وشي آ بعرفو كيفنو ... أشكال والوان ... بس الواحد يسوي يا إيدي شيليني ختيني ... لهطت الفيها النصيب وودعناهـم ... كرامة مقبولة ... كرامة مقبولة ورحنا على أهلنا .. الساعة تلاتة صباحاً والخلق متهردي عز النومة وأنا مصنقر فوق السرير وأمَنِّح .. البطُن فايري .. المكيف شغَّال وأنا أخرت في العرق ...بعد شويِّي بقى جري على الحمَّام ...ماسورة وإتحلجت ... ماكن طالبنِّي حليفي ...من كترت الجري على الحمَّام , قت أخير اللقعد بى جلابيتي بس ... أم الولاد صحت لقتني متل حمارة النوريق ... قالت لي نمشي الطواري اللت المستشفى , قت لها بى وين انا أسع .. ؟؟؟ سواقة ما بقدر أسوق وانا بالحالة دي .. وإن جبنا لنا ليموزين أقوم أزَروِط للراجل عربيتو قبَّال نصل للطواري ... أصبري شويِّي .. غَلَتْ لِي موية رًزْ .. في الأوال .. أشربها بى هِني , وتمرق بى هِني .. بقيت متل الصبَّابة ... نامن شكَّيت في نفسي .. شويِّي شويِّي الحال راح يهدأ .. وراجي الشمش دي  تشرق باللَّت الله ...

إتلبسنا ومشينا على المستشفى ...لقيت قدامي خمسة ولاَّ ستة .. صبقوني كيف آ بعرفن .؟؟ قعدت فوق الكرسي راجي دوري .. مرة أخلف كراعي فوق التاني وإنتكي .. ومرة أرفعن الاتنين وأعصِرِن علي بطني .. والراس متل هبَّابة السعف أقبلو كدي وأقبِّلو جاي ..ندهوني ... دخلنا أنا والمرأة اللتي ... حكيت للدكتور الحاصل دخلني وراء الستارة هبَّش بالسماعة هني وهني قال لي أرفع الجلابيي لا فوق .. رفعتها ... ماني قايلو دار يعصرني في بطني .. قلت يبقى دار يخُت السمَّاعة بس ... وقال كدي بى إيديهو الاتنين متل الدار يلخ لو عجين ...أنا أسوي لو يا زول أقيف ..وهو التقول دار يشتري لو بتِّيخة ... أداها عصرتين نصاااااح واحدي بالجنبة والتاني في النص ... اللَّت النص دي ياها الأذتني وشالت حالي .. من شدّة خُلقِي ما ضاقت من الشي السويتو انا , والسواهو هو , قرررررربت أدفروا من قبل وِشِّي  وأشنقلو على قفاهو وأجي مارق ...نزلت من محل الكشف ده بى صفحتي أبيت أصنقر.. قت للمرأة اضربي لى خالد ود خالي اليجيب لي هدوم من الدولاب .. مرقت من العيادة ماشي على الحمَّام ... بى سِرِّي أقول لى نفسي إن شاء الله الناس ديل يبقى قاع يضربوا المستشفى دي بى بف باف من الصباح ولا شي ..خفت الضبابين يجن يفضحنِّي زيادي ... الهدوم جَن .. غيرت وجيتو صاد, الممرضة قالت لي أقعد قبلك برا هني نامن نقول لك شي ... قعدت .. خالد قال لي ياخي انا شغال , قت لو شكراً ياخالد روح لى شغلك .. إن شاء الله ما نعدمك .. ومرتي جنبي .. جوا إتنين .. مُمَرِّض و مُمَرِّضة ..فلبينيين .. جارِّين لهن سرير بى عجلات .. بقوا يسوُّوا .. أبد الأسيم ... أبد الأسيم ..( عبدالعظيم ) وقفت على حيلي و إتلفتَّ جاي وجاي وقت لهن أيوا ..قالوا لِي .. تعال بابا ... تعال باباااا ؟؟؟  مااالكن ...؟ مودنِّي وين ..؟؟  يلا بابا ... سرعة ...سرعة ... إنبطحت فوق السرير وجروني ... ومرتي تعصِر و تَخُب بى وراي .. دخلوني في أوضة وجابوا لي لبسن المتل لبس المساجين ده .. وراسي يودي ويجيب .. يا ربي الدكتور ده لقى لو شيتاً ماهو دار يحدسني بيهو ..؟ ولاَّ الناس ديل مالن ..؟ أسعل فيهن صديق إيش في ..؟؟؟ صديق إيش في ..؟؟؟ يعاينوا لي وما يردوا علي .. جنس دغالتن في الحمير ماها في ...مرتي دار تدخل معاي أحموها .. المسيكيني واقفي برا فوق كرعيها .. جابولن دواء أبيض في قِزيزِي يخجو فيهو  دار يسقوني ياهو .. بلا جاء واحد داخل عليهن ...عاين لي لقاني مصنقر دار أشرب الدواء ...بى حد ما فيهو من حِس نهَرُن جنس نَهرَه ... نامن بقوا ينطقشوا فوق بعضُن ... إييششش هااادااا ..؟ هادا مافي عبدالعظيم ..!!! انا من الهجمة وقفت على حيلي ودار أجري على الحمَّام تاني .. عبدالعظيم مصري .. مصري .. مافي سوداني.

عبدالعظيم الطاهر عثمان

( الدبيب )

( الدبيب )

زمااااان ساعتي الكنت بقرا في الكتّاب ... في البلد ... جيت مندلي بى عند البحر ... ماسك القيف وماشي وأغني ... لامن جيت بى مكان كدي  ... ملان دشش وعميوق وجضول اللات تمر ...... مرميات .... وانا ماشي وأغني بلا جلابيتي كرنت لها في عميوقه .... دنقرت بشويش دار امرقها ...خايفها تنشرط ... ياها جلابيتي اللت العيد دنقرت كدي , بلا لقيت لك الشي مطوطو في العميوقه متل حبل الآشميق ... دبيب قدر ده .... بقيت أهبش في الواطا ... كايس لي درابة ولا حجر أضربو بيها فوق راسو ...فجأة ..... لقيت لك الشي نط وإتلولو في كراعي .... من شدة الهجمة بقيت واقف متل العود المجندل .... قاطع الحركة ... وأرجف من رأسي لا كرعي ...حسيت لي بى شيتاً دااافئ سايل فوق كرعي ...والدبيب فاتح خشمو ويتمطق متل الورل البيرضع لو في غنمايه .... بعد شويه قام نزل .. وانا أصلي واقف عود يابس ... مسكت كراعي وبقيت أعاين لها ... لا عرفتو قرصني ولا ما قرصني ... بس كراعي بقت لي واارمي ومنفوخه ... تقول مسوين لها باكنبودر ... رحت أهلي أجرجر فيها وانا بالي ضمه ما هو في ... لزيت الباب الليل الحوش بى إيدي ودخلت ... قعدت فوق العنقريب ماسك كراعي ... أمي في اللقدابة شافتني نطت من عنقريبا وجاتني تجري ... قالت لي مالك ماسك كراعك ... ؟  الفي شنو طعنتك شوكي ..؟ قت لها قرصني دبيب ... بقت تسكلب وتجري لا برا ... تسوي في الوا مغستا  ووب عليها ... وناس البيت اتكبسوا  فوقي لفحت توبا وفتحت الباب ومرقت ... جات سايقي معاها نصرالدين  التمرجي , أهلن بى ورانا شغال في الاسبتالي اللت مروي .... جاء من بعيد يتضرع وشايلو شي في إيدو بس تقول طرمبة اللت فليت ... يكفكف في ضرعاتو ... تقول داير يضبح لو خروف ... يسوي لي آزول مافي عوجي ... مافي عوجي تب إن شاء الله .... بطحني فوق العنقريب  وطبزني حقنة فوق صلبي  , قرصة الدبيب أبرد مالاها  نامن حسيت بى عروق إضني ديل يطقطن... وجاتني دوخة متل زول المريسي ... عليكن أمان الله تميت لي يبقى دورين ماني قادر أصنقر فوق العنقريب متل الناس , علا أكوع بى صفحتي متل الجبنة التاكنها فوق الوقاية ... وحاتكم لا يوم الليلي ماني عارفنو قرصني ولا لأ ..؟ كراع الجن كانت ملاني شقوق يكدوبا حلة الملاح عدييل كدي ...

عبدالعظيم  الطاهر عثمان

المُركَب

المُركَب

جيت داخل البيت وعرقي ينقط … وجلابيتي ملصقة فوق ضهري من كترت العرق بتل الزير اللافنو بى خيشة … جريت لي عنقريب هبابي صغير كدي على ضل العنابة … شناطو بى قدام مقطع بتل الزول السنونو مكسرات … قت لى ناس البيت عليكن الله سووا لي كباية اللت ليمون … اللشربها …الحر فاسخني ... أمي لقيتا تبكي ...يمّة الفي شنو  ؟؟؟ قالت لي الراقد لها شنو ..؟ لا تكوع …قوم أمش الحق الناس … المركب اللت ود ارمنتي قالوا غرقاني … وخالتك ست البنات معاهن كانت في كريمي… صنقرت على حيلي مهجوم … قت لهن غرقاني وين ..؟ وخالتي مشت كريمي لى شنو ..؟ أمّي ترمي في دميعاتها … قالت لي قوم … قوم … فسراع أمش ….. قمت بى عرقي داك لابس لي فردة نعال والتانية جارها في كراعي … وجريت على البحر … لقيت المركب مكفية والناس ملمومين فوق القيف … وواحدين نطوا بى جلاليبن فشان يمرقوا الحريم .. مطفحين فوق وشي الموية بتل الفاصوليا البالينها في الصحن …. بقيت اسوي لن .. خالتي وينها ..؟ قالوا لي خالتك مرقت … مرقها توبها .. إتنفخ بالهوى بقى بتل القربة وخلاها مطفحي والناس لحقوها فسراع قبال ما تنشرق … قت لهن في زولاً غرق ..؟ قالوا لي … لا …. الحمدلله كلهن مرقوا سالمين … علا ود النعمان مرقناهو مغبي .. كرشوا إتملت مويه شالوهو على الاسبتالي اللت مروي .. علا آب تجيهو عوجي شي … وانا واقف اعاين مختار ود النخيل في نص البحر عايم جايي على الحجرة … قت لهن خلوني اللحقو … قالوا لي آزول الشي ده تمساح تلحق أشنو … بيجي … بيجي .. ماسك لو شي بى إيد ورافعو لا فوق .. وعايم بالايد التانية .. وكت قرب شويه علينا بقى يطمس ويقلع … يطمس ويقلع …الناس بقوا يكوركو لو … أرم الجزلان .. آزول ارمي الجزلان … أرم الجزلان …. وصل عند الحجرة يناهد ونفسو قايم .. عويناتو بتل الزرزور يغمدن ويفتحن … الناس بقوا يهرجوا فوقو .. آزول دار تودر روحك نحنا نقول لك أرم الجزلان … أرم الجزلان قال لهن :- نان الجزلان قاع يعرف يعوم …؟ خالتي الناس شالوها طب العصب .. وجروا بها على اهلها .. مشيت لحقتها … اول من شافتني داخل عليها بقت تبكي وتقول لي … كُر عليّ انا يا وليدي .. كت دار اموت بلا تدفنوني …. نحنا ناكل في السمك والليلي كان دار ياكلنا … بركة البقى مافي تمساح كان ما لقيتولكن شيتاً تدفنوهو … كان عضيماتنا ما لميتوا فيهن … قت لها حمدالله على السلامي بركة المرقتي احمدي الله … لكن توبك ده …؟ حقو تكرميلو هو ….

عبدالعظيم الطاهر عثمان